Umeed abhi kuch baqi hai
Ek basti basne wali hai,
Jis basti me koi zulm na ho
or jeena koi jurm na ho,
wahan phool khushi ke khilte ho,
or Mausam saare miltay ho,
Bus rang o noor barastay ho,
or saare hanste bastay ho,
Umeed hai aisi basti ki..
Jahan jhoot ka karobar na ho,
Dehshat ka bazar na ho,
Jeena bhi dushwar na ho,
Marna bhi aazar na ho,
Ye basti kash tumhari ho,
ye basti kash hamari ho,
Wahan Khoon ki holi aam na ho,
us aangan gham ki shaam na ho,
Jahan munsif se insaaf mile,
Dil sab ka sab se saaf mile,
Ik aas hai aisi basti ho..
Jahan ROTI zehar se sasti ho,
Umeed abhi kuch baqi hai,
Ek basti basne wali hai...